هنا شقلبان
محطه إذاعه حلاوه زمان
من القاهرة
ومن كردفان
وسائر بلاد العرب
واليابان
ومن فنزويلا
وايضا ايران
ومن أي دار
او بلد مستباحه
بفعل السياحه
مع الامريكان
هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر
وتليفويونات
وخطبا ف جوامع
وجبنه وزيتون
ونقزح ونركب جميع الموجات
ونبحث ونفهم
فى كل الشئون
وديما نلعلع فى كل الحالات
ولا حد سامع
ولا يحزنون
وتمسع ما تسمع
دا ما يهمناش
لان احنا اصلا
بناكل بلاش
فخليك فى نفسك
وما نخليناش
نسلط عليك القلم
واللسان
هنا شقلبان
محطه اذاعه حلاوه زمان
يسر الاذاعه
وما يسركوش
بهذي المناسبه
وما بندعيكوش
نقدم اليكم
ولا تقرفوش
شحاته المعسل
بدون الرتوش
شبندر سماسره بلاد العمار
معمر جراسن للعب القمار
وخارب مزارع
وتاجر خضار
وعقبال املتك
امير الجيوش
ما تقدرش تنكر
تقول ما اعرفوش
ما تقدرش ايضا
تقول ما اسمعوش
شحاته المعسل
حبيب القلوب
يزيل البقع
والهموم والكرب
يأنفس
يأ فين
يبلغ حبوب
ويفضل يهلفط
ولا تفهموش
وتفهم ما تفهم
دا ما يهمناش
لان انت فاهم
وعامل طناش
ح تنكر وتحلف
ح اقول لك بلاش
ح تتعب دماغنا
وتتعب كمان
هنا شقلبان
محطه اذاعه حلاوه زمان
لان المخبى ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبية
وعن كيت وكان
وعن محسوبيه
وعن العبان
ظهر فى المدينه
كانه الطوفان
وغرّق مراكب
وسوح غيطان
وبعض المراكب
ح تغرق كمان
وازمه مساكن
وازمه امان
وعالم بياكل
فى عالم جعان
وريحه مؤامره
فى جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما ابلغونا
جميع الودان
لهذا وذاكا ... وتكلم كمان
نقدم اليكم
عروسه وحصان
شحاته المعسل
وهذا البيان
هنا شقلبان
محطه اذاعه حلاوه زمان
بسم الله
سلامٌ عليكم
وسلمون وموز
واما المسائل
فهنجف ولوز
فيا اخوتى
ويا اخوات
اليكم بيانى
كما هو ات :
جميع المسائل
تمام التمام
وكل الكلام دا
مجرد كلام
فصبرا جميلا
ولا تقلقوش
وشغل الضغاين
انا ما اقبلوش
ما فيش أي حاجه !
على الطلاق والعتاق بالتلاته
ما فيه أي حاجه !
وقّـّدر كمان ان فيه أي حاجه
ما فيش أي حاجه
ما لوش أي لازمه الكلام
واللجاجه
وعيب ان عيل يسوق السماجه
ويعمل ديباجه
انا بطبعي ضد السماسره الكبار
بحكم المنافسه
وحكم الجوار
لكن مش ف الطبيعي
انى اعمل فضيحه
لو احد زميلي
هبش كام صفيحه
ما كل الزمايل
بتهبش صفايح
وكل اللي جاي
مش زي اللي رايح
فيا ايها الشعب
صهين تفعلص
مساء التنفس
مساء الرويح
اخويا الامير بزرميط الايرانى
بعت لي السنه دي
عزمنى ودعانى
انا قبلت طبعا
ورحنا العزومه
وكانت وليمه
ما تحصلش تانى
دا ايه المحمر
وايه المكمر
وايه المشمر
وايه الصوانى
انا دماغى تعبت
ولفت صراحه
من الفخفخه
والهنا الاصفهانى
هناك يعنى مثلا
اذا شربت طافيه ( نوع مهبب من الخمور يدعى منقوع البراطيش ايضا )
تمز بكوارع
وبسطرمه ضانى
ما شفتش هناك
ناس بتحقد عليهم
ولا ناس بتشتم
فلان الفلانى
لانه اشتري عزبيتن
من شطارته
وحكمة ادارته
وطلّع مبانى
وبعد الواليمه استلمنا الهدايا
مفضض
ومدهب
وقز وقيشانى
وطبعا اخويا الامير
قال لى حاجه
ح اقوالها لكو طبعا
اذا الوقت ناسب
ح يطلع لى عيل
بدون أي حاجه
ويعمل لى فلحص
ويقعد يحاسب
دا حقد اشتراكى انا ما اقبلوش
ولو هو ابنى انا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه ( اردغانة بمعنى ماخور شعبي )
وعايزين اسيب البلد
من زمان
وانا مش ح اسلم
واسيب الامان
ولابالبوليس والنيابه كمان
فيا ايها الشعب
كمل جميلك
وصبرا
واذلم حتيجى المصاري ( اذلم = اذا لم )
وتاكل وتشرب
تبع ما ياتيك
وتغرق فى بحر العبيد والجواري
وترسم حياتك
حسب ما يرائيتك
وتملا الحواري
فساقى وقصاري
تسبح بحمدك
وتشكر جميلك
وفضل الزباله
وطفح المجاريه
ختاما سلاما
واخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتى رئيسا
وابا
وجوز